Sunday, December 8, 2013

ត្រចៀក


ត្រចៀកនេះហត់នឿយម៉្លេះមិនស្រួលអី
រឿងចាស់ថ្មីដែលគេស្ដីរៀបរ៉ាយរ៉ាប់
ទោះជាយល់ឬមិនយល់ឲ្យតែប្រាប់
ប្រុងប្រៀបស្តាប់យូរឬឆាប់ប្រឹងចងចាំ។

គេចង់ស្រួលរវៃមួលញាប់ហត្ថា
ស្រៀវអស្ចារ្យលូកលុញត្បាររាល់ខែឆ្នាំ
ត្រចៀកព្រឺរមាស់ឈឺសែនរងកម្ម
សុខចិត្តទ្រាំឲ្យគេខ្វេះខ្វាយតាមចិត្ត។

ពេលត្រូវការពាក់វ៉ែនតាសម្រួលភ្នែក
ក៏រំលែកយកដែកដងពាក់គាបកិត
ចូលជាប់ទ្រុឌមុតជាំសាច់ស្អុះស្អាប់ស្អិត
ភ្នែកដេកបិទយប់ងងិតជួនភ្លេចដោះ។

សូរសំនៀងបទចម្រៀងគ្រប់ដំណើរ
ពាក្យសសើរជេរបញ្ចោរអសុរោះ
ត្រចៀកហ្នឹងខំប្រឹងថតយកទាំងអស់
ស្ត្រីបុរសស្រៀវស្រណោះត្រង់ត្រចៀក។

No comments:

Post a Comment