Saturday, October 26, 2013

ចង់ត្រឹមឃើញភក្ត្រ


គន់សម្លឹងកញ្ចឹងកល្អហ្មត់ខៃ
កួចស្រមៃអាល័យគិតឥតចង់បែរ
ច្រួលច្របល់រចល់ចិត្តត្បិតលួចស្នេហ៍
បើបានក្បែរថើបថែក្លិនមិនជិនណាយ។

ផ្នួងកេសាបុប្ផាគន្ធពន់ពេកណាស់
ចង់ឃើញណាស់យល់ច្បាស់ជាក់ភក្ត្រឆោមឆាយ
ស្អាតយ៉ាងណាជីវ៉ាស្ងួនអូនបែរអាយ
កុំចំណាយអន្លាយពេលវេលាអី។

សុំទស្សនាភក្ត្រានាងដៀងមកពៅ
កុំធ្មឹងនៅរៀមសៅហ្មងប៉ងមើលស្រី
មួយភ្លែតចុះក៏អស់ចិត្តឥតមានអ្វី
ស្រស់ពិសីប្រណីខ្ញុំសុំគយគន់។

No comments:

Post a Comment