Friday, October 18, 2013

ឆៃយ៉ាំ


ចុះឯណាវើយ! ថាឯណេះទេ!
កុំនៅទំនេរ មករាំឆៃយ៉ាំ...។

កឋិនវត្តយើង គគ្រឹករាល់ឆ្នាំ
សម្លបាយដាំ ទទួលភ្ញៀវផង។

ខ្ញៀវខ្ញារខ្លាំងណាស់ ក្មេងចាស់អឺងកង
សូរស័ព្ទធម៌ផង ពុំមានស្ងប់ស្ងាត់។

ក្រវេក្រវូ ហៃ!ខ្សែក្រវាត់
លោកខែបាំងឆ័ត្រ ឆ័ត្របាំងលោកខែ។

ជិតដាច់អស្សុជ សន្ទូងចេញផ្លែ
ស្រូវទុំហូរហែ ច្រូតមិនទំនេរ។

ចុះឯណាវើយ! ថាឯណេះទេ!
ស្រលាញ់កូនគេ នាងមានប្ដីហើយ។

ចូលខែកក្ដឹក ខ្យល់បក់ប៉ើយៗ
អ្នកម្ដាយកូនអ្ហើយ ឃើញគេរៀបការ។

យ៉ាស់!កណ្ដុំឆែប ថាកង្កែបឆា
កម្លោះហ៊ឺហា មេម៉ាយហំហែង។

ម្ដេចមិនយកគូ ស៊ូនៅតែឯង
គេងព្រួយចំបែង ប្រយ័ត្នស្ដាយក្រោយ៕

No comments:

Post a Comment