Tuesday, May 21, 2013

កាលនោះ....


ឃើញកង់ដាក់ផ្កានឹកស្រមៃ
កាលឆ្នាំប៉ែតប្លាយមានកង់មួយ
ជិះចេញម្ដងៗគឺរញ្ជួយ
ភ្នែកនរណាមួយមិនសម្លឹង?។

ផ្កាជ័ររំយោលស្រោមកែបដៃ
កញ្ចក់អាថ្លៃបញ្ឈរឆ្កឹង
រ៉ឺងៗស៊ីញ៉ូដោយកណ្ដឹង
ធាក់ជ្រែក្រឡឹងបង្ហាញរាង។

ពេលមានបុណ្យទានវត្តនានា
ជិះកាច់កុងកៀរវាតវង់វាង
ចាស់ៗថាវើយកុំកាច់រាង
អានាប្រយ័ត្នដួលហុយដី។

មានកង់នោះមួយមិនធម្មតា
ដូចមានហុងដា ០១៣
ឆ្វែលគ្រប់ទិសទីរាល់រាត្រី
ដើរឌីតស្រីៗចិត្តប្រាំបួន។

មិនមែនភ្នំពេញនៅតាមខេត្ត
ដើមទសវត្សប៉ែតទើបរួចខ្លួន
គ្មានឡានម៉ូតូជិះសមសួន
អាស្ងួនកង់ផ្កាមហាឡូយ។

No comments:

Post a Comment