Tuesday, April 30, 2013

អង្គារអង្គុយ......


អង្គារអង្គុយគិត
ប្រុងគំនិតគិតគូរការ
អង្គារអង្គុយចារ
ចេញចំណារចារកំណាព្យ។
អង្គារអង្គុយស្ងៀម
លើកប៊ិចបៀមអង្កៀមស្ងាប
អង្គារអង្គុយខាប
កកាយកាព្យខាបតាក់តែង។
អង្គារអង្គុយឈ្ងោក
ងុយងក់ងោកឈ្ងោកសម្ដែង
អង្គារបំបែកបែង
ល្បិចល្បោយល្បែងលេងចុងចួន។
អង្គារអង្គុយចាំ
តាមចំណាំចាំតែងក្បួន
អង្គារជាជាប់ជួន
សុខសមសួនខ្លួនកាយចិត្ត។
អង្គារអង្គុយធ្មឹង
ស្មឹងស្មាធិធ្មឹងប្រឹងរិះគិត
អង្គារត្រួតពិនិត្យ
ផ្ដួចផ្ដើមគិតផ្ដិតកិច្ចការ។
អង្គារអង្គុយគង
តាមទំនងគងទាក់ខ្លា
អង្គារទល់ចង្កា
ចោលនេត្រាចេញទៅក្រៅ។
អង្គារអង្គុយល្ហែ
ថ្ងៃដាច់ខែក្បែរគោលដៅ
អង្គារអង្គុយក្ដៅ
ព្រោះកម្ដៅក្ដៅខ្លាំងក្រៃ។
អង្គារអង្គុយស្ងាត់
សូមប្រយ័ត្នអគ្គីភ័យ
អង្គារនាពេលថ្ងៃ
ភ្លើងព្រែផ្សៃឆេះគ្មានសល់។

No comments:

Post a Comment